13.12.3013 iravunk.com

Վերջին շրջանում համացանցում պտտվող աջակցություն հայցող կոչերը, հիվանդությունների պայքարի դեմ գումարային օգնություն ակնկալող լուրերը բավականին մեծ քանակություն են կազմում: Իհարկե, ցավալի է, որ տեղեկացված լինելու մեր իրավունքի «ազատագրումը» այս տեսակի իրականությունն է ջրի երես հանում, բայց մյուս կողմից էլ, հենց այդ ճանապարհով շատ մարդկային կյանքեր են փրկվում, առողջական վիճակներ բարելավվում:

«Օգնենք հայ մանուկներին» բարեգործական հասարակական կազմակերպությունը Երևանի`Հովհաննես Թումանյանի անվան պետական տիկնիկային թատրոնի աջակցությամբ օրերս ներկայացրեց « «Բարդերն» ընդդեմ բարդ հիվանդությունների»խորագիրը կրող միջոցառումը, որին մասնակցում էին հեղինակային երգի կատարողներ` Էդուարդ Զորիկյանը, Դավիթ Ամալյանը, Վախթանգ Հարությունյանը, Արմինե Հայրապետյանը, Գագիկ և Սարգիս Շիբոյանները, Կարեն Մամիկոնյանը, Արմեն Ադամյանը, Ռուբեն Քամալյանը, Վարդան Գալստյանը:

Համերգային այս ծրագրից ակնկալվող առաջնային նպատակը` դրամական աջակցությունը, դարձավ լոկ ածանցյալն այն ամենի, ինչ արվեց: «ՄԱՐԴ» դաստիարակության, կարիքավորին օգնելու ոգու բարձրացման, ճիշտ ձևով բարեգործություն անելու մշակույթի ձևավորման ենթակետերն այնքան ակհայտ էին տարածվել դահլիճում, որ գումարայինը, երևի, նվազագույնն էր, ինչ արեցին ԲԱՐԴերը: Երբ մի ամբողջ դահլիճ հոտնկայս երգում է «Հուսո առագաստը» ու վստահ է, որ բաց ծովն առջևում է…

«Մեր արածն իրականում կաթիլ է, բայց  նման կաթիլներից է բաղկացած ծովը: Շնորհակալություն քեզ` հանդիսատե՛ս` քո ներկայությամբ հաստատելու համար, որ օգնող ձեռքը դեռ չի չորացել», - ելույթից առաջ ներկաներին իր խոսքն ուղղեց ԷԴՈՒԱՐԴ ԶՈՐԻԿՅԱՆԸ:

«Այս գործը եկեղեցի գնալու պես բան է, արժեք, որի մասին պետք չէ խոսել. Աստված բոլորիս հետ… Ի վերջո, հոգու թռիչքն այնքան մեծ է, որ մի քանի հոգիների միությամբ սարեր կարելի է շուռ տալ»,-վստահեցրեց ԴԱՎԻԹ ԱՄԱԼՅԱՆՆ ու հավելեց. «Ամենամեծ «քաղցկեղը»,  ամենալուրջ ու վտանգավոր հիվանդությունը ինքնասիրահարվածությունն է, Աստված այ սրանից թող հեռու պահի: Հոգու հիվանդությունն է անբուժելի, իսկ մարմինը առողջ հոգում ապաքինման ելքեր կգտնի»:

«Իրավունքին» պատմելով  «Օգնենք հայ մանուկներին»  ՀԿ-ի մասին՝ կազմակերպության անդամներից ՎԻԿՏՈՐՅԱ ԵՓՐԵՄՅԱՆԸ նշեց, որ արդեն շուրջ 2 տարի է, ինչ կազմակերպությունը ծավալում է իր գործունեությունը`առաքելություն ունենալով օգնել հիվանդ և անապահով ընտանիքներում բնակվող երեխաներին, և այս տարիների ընթացքում կազմակերպել են տարբեր մշակութային միջոցառումներ, որոնցից ստացված  գումարներն ամբողջությամբ փոխանցվում են տարբեր հիվանդ երեխաների:

«Բարդերին շատ ենք սիրում ու վստահ ենք, որ միշտ մեր կողքին են, ինչպես որ եղան մեր առաջին քայերից սկսած»,- ասում է Վիկտորյան:

Իսկ թե արդյո՞ք շոուբիզնեսյան ներկայացուցիչներին երբևէ դիմել են, և եղե՞լ է արդյոք համագործակցություն, մեր զրուցակիցը պատասխանեց. «Սեպտեմբերի 9-ին տեղի ունեցած մեր հերթական «Անհնարը իրական է» միջոցառումը կյանքի կոչվեց նրանց մասնակցությամբ: Համերգին ներկա էին Հասմիկ Կարապետյանը, Արմինկան, Սուսաննա Պետրոսյանը, Լուսինե Աղաբեկյանը, Վարդան Բադալյանը և այլոք: Քրիստինե Պեպելյանն էլ, չնայած այդ օրը չկարողացավ գալ, բայց երեխային փոխանցեց 100 000 դրամ»:

Հ. Գ. « «Բարդերն» ընդդեմ բարդ հիվանդությունների» համերգի դահլիճում ներկա էր նաև այն փոքրիկը, ում համար արվում էր այս ամենը…

Համերգից ստացված գումարային աջակցությունը կազմեց  812 000 ՀՀ դրամ:  Ի դեպ, ստացված գումարը ոչ միայն վաճառված տոմսերի, այլ նաև բարդերի տրամադրած գրքի`«Հեղինակային  երգի  հավաքածու համար 2» վաճառքից է կուտակվել: Գիրքն իրենից ներկայացնում էր 17 հեղինակ-կատարողների 127 ստեղծագործություններ՝ կիթառի ակորդներով, բառերով, ինչպես նաև  MP3 սկավառակով:

ԱՌՈՂՋՈՒԹՅՈՒՆ ՔԵԶ, ՍԵՐՅՈԺԱ՛…

8- ամյա Սերյոժայի մոտ 2012 թվականի սեպտեմբերին ախտորոշվել է հիպոֆիզի ցողունի կիստոզ կրանիոֆարինգիոմա: 2013թ.-ի փետրվարի 7-ին նրան վիրահատել բիֆռոնտալ-քունքային շրջանում ոսկրապլաստիկ տրեպանացիա ուռուցքի ռեզեկցիայով: Վիրահատությունից հետո կրկին վիրահատել են վիճակի վատթարացման պատճառով`Ռիկհեմի ռեզերվուարի իմպլանտանցիա: Երեխան կարիք ունի ևս մեկ վիրահատության, որը ՀՀ պայմաններում հնարավոր չէ իրականացնել: Նման բուժում իրականացվում է միան Գերմանիայում և Սանկտ Պետերբուրգում: Սերյոժայի ծնողներն արդեն փաստաթղթերն ուղարկել են Սանկտ-Պետերբուրգ` Բեխտերևի անվան «մարդու ուղեղի» ինստիտուտ, որտեղից հայազգի պրոֆեսոր Խաչատրյանը պատրաստակամություն է հայտնել իրականացնելու վիրահատությունը: Թե որքան գումար կպահանջվի դրա համար, դեռ հայտնի չէ, սակայն ընտանիքը ծանր ֆինանսական դրության մեջ է, իսկ սպասվող գումարը` զգալի մեծության, և հետևաբար` յուրաքանչյուրիս ներդրումն անչափ կարևոր է այս երեխայի ապաքինման համար:

Երեխային օգնելու համար կարող եք փոխանցումներ կատարել ԱԿԲԱ-ԿՐԵԴԻՏ ԱԳՐԻԿՈԼ բանկում բացված դրամային հաշվեհամարին՝ 220291788317000, ստացող՝ Հերմինե Մնեյան:

ԷԹԵՐԻ ՄԱՄՈՒԼՅԱՆ

Դիտել միջոցառման մյուս նկարները